Елордалық әуежайда Air Astana әуекомпаниясының жаңа борты таныстырылды
Жаңа борттың салтанатты ашылуына ҚР Индустрия және инфрақұрылымдық даму министрі Қайырбек Өскенбаев, ҚР ИИДМ КММ төрағасы Талғат Ластаев, "Қазақстанның авиациялық әкімшілігі" АҚ Бас директоры Каталин Раду, "Нұрсұлтан Назарбаев халықаралық әуежайы" АҚ Басқарма төрағасы Дәулет Хамзин, журналистер, блогерлер және қоғам қайраткерлері қатысты.
Қазақстан Республикасының Индустрия және инфрақұрылымдық даму министрі Қайырбек Өскенбаев Air Astana авиакомпаниясын 20 жылдық мерейтойымен құттықтады.
"Бүгінгі таңда авиакомпания жолаушылар ағынының өсуінің оң динамикасын көрсетіп отыр. 2002 жылы қызметтің басында Air Astana әуе кемелері паркінде небәрі 3 ұшақ болған. Бүгінде еліміздің ішкі тұрақты әуе тасымалдарына тартылған барлық ұшақтардың жартысына жуығы авиакомпанияға тиесілі", - деп атап өтті министр.
Бұл күні Air Astana флоты Airbus a321lr ұшақтарымен толықтырылды. Ең жаңа лайнер алдыңғы түнде Гамбург зауытынан келді.
Air Astana президенті Питер Фостер барлық қазақстандықтарға авиакомпанияны таңдағаны үшін алғысын білдірді.
"Біз 10-шы рет "Орталық Азия мен ТМД-ның үздік Авиакомпаниясы" номинациясы бойынша беделді Skytrax сыйлығына ие болып, жоғары сапа стандарттарына адалдығымызды дәлелдедік. Жаһандық және жергілікті қиындықтарға қарамастан, біз жаңа жетістіктердің негізін қалау арқылы аймақтық және халықаралық нарықтардағы позициямызды нығайта алдық. Біздің алдымызда Airbus A321LR және Boeing 787 сияқты алдыңғы қатарлы ұшақтармен флотты толықтыратын үлкен болашақ бар деп сенеміз. Мұның бәрі біздің қызметкерлеріміздің кәсібилігі мен клиенттердің қолдауынсыз мүмкін болмас еді. Бізді 20 жыл бойы таңдағаныңыз үшін рахмет", - деді Питер Фостер.
Бүгінгі таңда Air Astana маршруттық желісі 42 бағытты (27 халықаралық және 15 ішкі), FlyArystan - 34 бағытты (8 халықаралық және 26 ішкі) қамтиды.
Air Astana биыл Ираклион мен Бодрумға жаңа тұрақты рейстерді іске қосты, сондай-ақ Алматыдан Бангкок пен Бейжіңге әуе қатынасын жаңартты.
Әуекомпания 2002 жылы өз қызметін бастағаннан бері 60 млн-нан астам жолаушыны және 280 мың тоннадан астам жүк пен поштаны тасымалдады. Жыл соңына дейін 7 млн-нан астам жолаушыны тасымалдау жоспарлануда, бұл 2021 жылмен салыстырғанда 12% - ға артық. Осы жылдың 10 айындағы таза пайда 65 миллион АҚШ долларын құрады, бұл өткен жылдың сәйкес кезеңімен салыстырғанда 84% - ға жоғары.
